1794
de nundinis jn halen 1292.
Wi Jan bi der gracien ons heren Hertoghe van lothrike. van brabant
ende van lymborch, maken cont allen den ghenen die dese lettre sien
selen ende horen, ende sonderlinghe, den Rechtre, den scepenen ende
den portren ghemeinlec van Sent Truden. dat wi om onsen, ende om
20onser stat van halen ghemeinen orbore, die vriheit van der
voreghenoemder stat van halen, hebben gebreit ende gemeerret in der
manieren, dat die vorghesegede vriheit duren sal tote Gheraerts gerechte
van velpe ane dene side, ende tote gheraerts gerechte van zelleke ane
dander side, so dat alle dat daer binnen gelegen es, ter vriheit van halen
25behoren sal in manieren dat men alle de ghene die binnen der vriheit van
Halen, wonen ochte comen selen, met vonnesse der scepenen van
halen van allen saken ende van allen anetalen handelen sal, Ende so dat
elc menssce van allen saken ende van allen anetalen, daer hi af binnen
der vriheit ane gesproken wort, met sinen eede hem onsculdeghen
30mach, hen si dat sake, dat hijs met scepenen monde, ochte met scepenen
lettren van halen, becommert worde, Oec hebben wi gegeuen, ende
geuen onser voregenoemder stat van halen, ene dachmarct, alle
sonnendaghe, ende alle iare ene iaermarct, emmermeer te houdene ende
te hebbene, dats te verstane dat die iaermarct beghinnen sal, des
35donredaechs, na den andach van Chinxen dach, ende sal duren achte
daghe, in manieren, dat men binnen dien dat die iaermarct gheduren sal,
in der vriheit, niemene en sal arresteren moghen, noch beclagen, noch
van scoude, noch van engheenrehande saken, hen ware dat hi mesdade
binnen der vriheit, die wile dat die marct gedurede. Vort die ter
40dachmarct te halen comen, en sal men moghen arresteren noch
beclagen, noch des daechs vore den dach van der marct, noch des daechs
dat die marct es, noch also lange alse si binnen der vriheit sijn. noch des
anders daechs dar na dat si die vriheit rumen van halen, om
engheenrehande sake, hen si van scoude, van geloue, van mesdade, ochte
45van saken, dies men mont ochte scepenen lettren van halen heuet, Ende
1795
1dit geleide ende dese vriheit ghelouen wi te houdene ende te doen
houden, ghelijc dat se vore bescreuen sijn, vast ende gestade, Ende dat en
selen wi laten, om negheenrehande dinc, die tusscen ons ende onse liede
in dene side, ende den bisscop van ludeke ende sine liede in dander
5side, ochte oec die tusscen ons ende den Graue van loen geuallen sijn,
ochte gheuallen moghen, in wat manieren dat dat si. Jn orconden van
desen dinghen, ende om dat wi willen, dat si ewelec vast bliuen ende
ghestade, hebben wi dese lettre doen segelen met onsen segele; Dit was
gedaen, in ons heren iaren .m.cc. twee ende Neghentech, Jn Chinxen Auonde